ဘုရားအမည်	ရွှေပုံတောင်ရန်အောင်မြင်ဘုရား
တိုင်းဒေသကြီး/ပြည်နယ်	မကွေးတိုင်းဒေသကြီး
Website Address	ဘုရားသမိုင်းများကြည့်ရန်
တည်နေရာ	အမှတ်(၁)ရပ်ကွက်၊ ချောက်မြို့ ၊ချောက်ခရိုင်။
သမိုင်းကြောင်းရာ
သက္ကရာဇ် (၈၆၇)ခုနှစ်တွင် အင်းဝဘုရင် ရွှေနန်းကျော့ရှင်နရပတိမင်း တည်ထား ခဲ့ပါသည်။ နရပတိမင်းလက်ထက်တွင် ပုန်ကန်ထကြွမှုများပေါများပြီး ပွဲဦးထွက်ပုန်ကန်မှုမှာ စလေပုံတောင်ရပ်၌ ဖြစ်ပါသည်။ ညောင်ရမ်းစား ဘယကျော်ထင်၏သား ငတုံးတာနှင့် ရှိရှားယင်းတော်စား ညီဖြစ် သူ ငပြည့်ဝတို့သည် တောင်ငူမင်း၊ ပြည်မင်းတို့၏ အကူအညီယူ၍ နိုင်ငံတော်ဖြစ်သော စလေမြို့ကိုဝိုင်းရံ၍ ပုန်ကန်ကြသည်။ ဘုရင်နရပတိမင်းသည် ရာဇသင်္ကြန်ကို စေလွှတ်ကာ တိုက်ခိုက်စေသော်လည်း အရေးမလှဘဲ ရာဇသင်္ကြန်ကျဆုံးခဲ့သည်။ နရပတိမင်းသည် ကုန်းဘောင်စော်ဘွား၏ အကူအညီရယူကာ ကိုယ်တိုင်ကွပ်ကဲလျက် ရေကြောင်း၊ ကြည်းကြောင်းချီ၍ တိုက်ခိုက် နှိမ်နင်းအောင်မြင်ခဲ့သည်။ ဘုရင်နရပတိ၏ အောင်ပွဲအကြောင်းကို အင်းဝစာဆိုအကျော် ရှင်မဟာရဋ္ဌ သာရက နောင်လာနောက်သားများသိရှိစေရန် "ပုံတောင်နိုင်မော်ကွန်း" အမည်ဖြင့် မော်ကွန်းတစ်စောင် ရေးသားခဲ့ပါသည်။ မူလစေတီမှ- ၁၃၃၇ ခုနှစ်၊ ဝါဆိုလဆန်း(၁)ရက်၊ အင်္ဂါနေ့ညနေ(၆)နာရီ (၃၅)မိနစ် တွင် ငလျင်ကြီးလှုပ်၍ပြိုကျပျက်စီးခဲ့သည်။ ၁၃၃၇-ခုနှစ်မှစတင်ကာ ရွှေပုံတောင်တောရ ဆရာတော်ဦးပဏ္ဍိတဦးဆောင်၍ မူရင်းအတိုင်း ပြန်လည်တည်ထားရာ ၁၃၃၈-ခုနှစ်တွင် ပြီးစီးခဲ့ပါသည်။ ဉာဏ်တော်မှာ (၃၄)ပေမြင့်ပြီး စေတီတော်ပတ်လည်တွင် အရံစေတီ (၂၄)ဆူ၊ မဟာရံတံတိုင်းပေါ်တွင် (၅၇)ဆူရှိပါသည်။ ဗုဒ္ဓပူဇနိယပွဲတော်ကို နှစ်စဉ်တော်သလင်းလပြည့်နေ့တွင် ကျင်းပ၍ သံဃာ့ဒါန စာရေးတံမဲဖောက် လှူဒါန်းသည့်ပွဲသို့ မြို့ပေါ်သံဃာများ(၅၀၀)ပါးခန့်ပင့်၍ ကောင်းမှု (၉)မျိုးဖြင့် ကျင်းပခဲ့ပါသည်။ ဂေါပကအဖွဲ့ ဦးအေဝမ်းဖြိုး၊ ဦးစိုးဝင်း ဦးဆောင်သည့် ဂေါပကများက ရွှေပုံတောင် ကျောင်းဆရာတော် ဦးသောမနှင့် ဦးတိက္ခသာရ တို့၏ ဩဝါဒကိုခံယူဆောင်ရွက်လျက်ရှိပါသည်။