ဘုရားအမည်	တန့်ကြည်တောင်စွယ်တော်ရှင်မြတ်စွာဘုရား
တိုင်းဒေသကြီး/ပြည်နယ်	မကွေးတိုင်းဒေသကြီး
Website Address	ဘုရားသမိုင်းများကြည့်ရန်
တည်နေရာ	ပခုက္ကူခရိုင်၊တန့်ကြည့်တောင်ပေါ်တွင်တည်ရှိသည်။
သမိုင်းကြောင်းရာ
ရှေးခေတ်အခါက ဟိရညကအမည်ရခဲ့သော တန့်ကြည်တောင်တော်မြတ်သို့ မြတ်စွာဘုရားသခင် သက်တော်(၇၀)၊ ဝါတော်(၃၅)ဝါအရတွင် ညီတော်အာနန္ဒာ နှင့်အတူ ဒေသစာရီကြွချီတော်မူလာပြီး ရပ်တန့်နားနေတော်မူ၍ ဗျာဒိတ်တော် မြွတ်ချမှတ်တော်မူခဲ့သည်မှာ ငါဘုရား ပရိနိဗ္ဗာန်ဝင်စံ၍ နှစ်ပေါင်း(၆၀၀)ကျော် အရောက်တွင် မြစ်တစ်ဖက်ကမ်းရေကန်နှင့် ပေါက်ပင်နေရာ၌ အရိမဒ္ဒနပေါက္ကံ ပြည်ကြီးပေါ်ထွန်းလတ္တံ။ အင်ဖက်သုံးချပ်ကိုထီးပြု၍ ကုသိုလ်ပြုသော မဟာပါလ ဒေဝယက္ခသည် ယင်းပေါက္ကံပြည်ကြီး၌ မင်းသုံးကြိမ်ဖြစ်လတ္တံ့။ ငါဘုရား၏ သာသနာတော် စည်ပင်ပွားများလတ္တံ့ဟု မိန့်တော်မူခဲ့သည့်အတိုင်း မဟာပါလတော် စောင့်ဘီးလူးသည် ပေါက္ကံပြည်ကြီး၌ စလေ မင်းခွေးတစ်ကြိမ်၊ နရသူမင်းတစ်ကြိမ်၊ နရသီဟပတေ့မင်းတစ်ကြိမ် မင်းသုံးကြိမ်ဖြစ်တော်မူခဲ့သည်။ သီရိဓမ္မာသောကမင်းကြီးလက်ထက်တွင် ဓမ္မာနုဂ္ဂဟအမတ်ဘဝဖြင့် တန့်ကြည် တောင်တော်မြတ်ပေါ်၌ မုဌောစေတီကိုကြီးကြပ်တည်တော်မူခဲ့ပြီး ပေါက္ကံပြည်ကြီးရှင် အနော်ရထာမင်းကြီးဘဝ တန့်ကြည်တောင်မြတ်ပေါ်၌ စွယ်တော်ပွားတစ်ဆူ ဌာပနာတော်မူ၍ မိမိ၏ ဘဝဟောင်းကကောင်းမှုကို အရှည်ပြုတော်မူခဲ့သည်။ တန့်ကြည့်တောင်ဟု ကျော်စောသည့် ဟိရညတောင်၌ သာသနာသက္ကရာဇ် ၂၁၈-ခုနှစ်တွင် အိန္ဒိယနိုင်ငံ(ဘာရတနိုင်ငံ)ပါဋလိပုတ် (ယခုပဋနာ)မြို့၌ နန်းတက်မင်းပြု၍ ၂၅၅-ခုနှစ်တွင် နတ်ရွာစံသော သီရိဓမ္မာသောကမင်းကြီး ဇမ္ဗူဒိပ်တစ်ကျွန်းလုံး မြို့ပေါင်း ၈-သောင်း၄-ထောင်တို့၌ ၈-သောင်း၄-ထောင်သော စေတီတို့ဖြင့် တန်ဆာဆင်အပ်သော ကျောင်းတိုက်ပေါင်း ၈-သောင်း၄-ထောင် တည်ဆောက်စဉ်က မုဋ္ဌောစေတီ တည်ထား စေခဲ့လေသည်။ အနော်ရထာမင်းစောဟူ၍လည်းကောင်း၊ သိရိအနုရုဒ္ဓါဟူ၍လည်းကောင်း တွင်သော အနော်ရထာမင်းသည် ပထမမြန်မာ၊ မွန်၊ ပျူနိုင်ငံတော်ကြီးကို စတင် တည်ထောင်ခဲ့သည်ဖြစ်သည်။ ပုဂံမင်းဆက် ၅၅-ဆက်အနက် ၄၂-ဆက် မြောက် မင်းဖြစ်သည်။ မြန်မာသက္ကရာဇ် ၄၀၆-ခုနှစ်တွင် နန်းတက်၍ ၄၃၉-ခုနှစ်တွင် နတ်ရွာစံတော်မူလေသည်။ အနော်ရထာမင်းကြီးသည် စွယ်တော်ပွားတစ်ဆူကို ဆင်ဖြူထက်တွင် တင်ပြီးလျှင် ကိန်းဝပ်စေတီတော်မူလိုသောအရပ်၌ ဆင်ဖြူဝပ်စေသော်ဟု ဓိဋ္ဌာန် တော်မူ၍ ဆင်ဖြူတော်ကိုလွှတ်လိုက်ရာ ဆင်ဖြူတော်သည် တန့်ကြည်တောင်ဖျား ထက်တက်၍ ဝပ်လေသည်။ အနော်ရထာမင်းတရားသည် မှူးကြီးမတ်ရာသေနာပတိ သဒ္ဓါကြည်ဖြူပြည်သူပြည်သားတို့ဖြင့် ဘုရားဇိနော်မြတ်စွယ်တော်ကို ဌာပနာ၍ စေတီတော်ကြီးကို တည်ထားကိုးကွယ်တော်မူခဲ့လေသည်။ ယင်းစေတီတော်ကြီးသည် တန့်ကြည့်စွယ်တော်ဟု လူနတ်ဗြဟ္မာ လောကဓါတ်တစ်လွှား လွန်စွာထင်ရှား ကျော်စောတော်မူလေသည်။